РПЦЗ: Молитва к Матери Божией во время войны
Молитва ко Пресвятей Богородице пред иконой ея Касперовския, чтомая во время войны
О Пречистая Дево, в войнах защитнице и за всех обидимых Предстательнице! Призри на беды любящих Тя и Сына Твоего! Умоли Его, якоже прежде, егда полчища ратников кораблями своими в море Чернем приступили ко граду нашему, хотяще разорити отечество наше и православных христиан порабо́тити. Тако и ныне, молим Тя, огради нас покровом Твоим, руки убийц удержи, ненависть и злобу угаси, нечестивых правителей вразуми, народы к Сыну Твоему обрати, еретические возстания низложи, сродники, рассеянные в беженстве, собери, заблуждшия во едино Христово стадо возврати. Избави нас Преблагословенная Госпоже, Мати Господа Вышняго, от всяких бед и скорбей, от всяких недугов и болезней, от внезапныя смерти, от напастей демонских и козней злых человек, яко Тобою и демоны попираются и вси враги наши посрамляются. Умоли, Госпоже Пречистая, Господа и о еже сохранитеся Отечеству нашему и Православной Церкви в мире и тишине, да и мы со всеми Святыми прославим Сына Твоего, во Святей Троице спокланяема и сславима, ныне и присно, и во веки веков. Аминь.